Koreja e Jugut ka zhvilluar të hënën një stërvitje artilerie me predha luftarake në një ishull pranë kufirit me Veriun.
Stërvitja njëorëshe u kritikua ashpër nga Peniani, i cili kishte paralajmëruar se ajo mund ta detyronte që të kundërpërgjigjej në një shkallë më të gjerë dhe më fuqishëm se më parë.
Muajin e kaluar Korea e Veriut goditi ishuj në jug pas një stërvitje të ngjashme të Seulit. Katër persona u vranë.
Ndërkaq, Koreja e Veriut njoftohet se ka rënë dakord që të lejojë rikthimin e inspektorëve bërthamorë të OKB-së si pjesë e masave për të ulur tensionet në rajon.
Ky hap u ndërmor gjatë një misioni të të dërguarit të posaçëm amerikan, Bill Richardson në Korenë e Veriut.
Ndërsa Korea e Jugut përgatitej për stërvitje, në New York, një mbledhje urgjente e Këshillit të sigurimit rreth krizës, përfundoi pa arritjen e ndonjë marrëveshje.
Takimi u zhvillua me kërkesë të Rusisë, e cila donte që OKB, t'i dërgonte një mesazh për vetëpërmbajtje si Veriut, ashtu dhe Jugut.
Ambasadorja amerikane në OKB, Susan Rice, tha se ndryshimet në qëndrimet e vendeve anëtare ishin aq të mëdha, sa nuk mund të tejkaloheshin.
Korrespondenti i BBC-së në Uashington tha se shumica e anëtarëve të Këshillit të sigurimit ishin për kritika më të ashpra ndaj Koresë së Veriut.