Në një aksident të rëndë trafiku që ndodhi të hënën në mbrëmje rreth orës 20 e 40 minuta në Grykën e Gërdelicës, në afërsi të Vranjës humbën jetën dy shtetas të Maqedonisë ndërsa një tjetër është lënduar. Në aksidentin e kanë humbur jetën 29-vjeçari Isni Bekiri dhe 32 vjeçari Abdulla Bekiri, ndërsa është lënduar 35 vjeçari Lirim Bekiri. Me siguri të tre janë vëllezër.
Gjatë aksidentit janë lënduar edhe katër shtetas të huaj, dy bashkëshortë dhe një fëmijë nga Polonia dhe një shtetas i Kroacisë.
Zëdhënësi i drejtorisë policore në Vranjë, Dragan Stamenkoviq tha se aksidenti ka ndodhur në dalje të tunelit “Manojlo” në autostradën Vranjë-Leskovc.
“Në aksidentin rrugor morën pjesë dy makina me targa të huaja dhe një automjet transportues me targa serbe, ndërsa detajet do të jenë të njohura pas ekspertizës e cila është në rrjedhë”, tha Stamenkoviqi.
Në shërbimin për pranim dhe përkujdesje të rasteve emergjente në Vranjë, mjekja kujdestare ka deklaruar për mediat serbe se janë pranuar katër pacientë me lëndime të rënda. “Tre prej tyre janë nga Polonia, bëhet fjalë për bashkëshortë me fëmijë, ndërsa njëri pacient është nga Kroacia”, deklaroi mjekja.
Në shpëtimin e udhëtarëve të pësuar janë përfshirë disa ekipe të shërbimit emergjent nga Vranja, Gërdelica dhe Leskovci.
