Gara për titullin e kampionit mes Barcelonës dhe Real Madridit në la Liga gjithashtu po ndiqet edhe me një garë tjetër jo më pak interesante, ajo mes dy yjeve më të mëdhenj të futbollit, Leo Mesi dhe Kristiano Ronaldo. Për momentin portugezi është golashënuesi më i mirë në La Liga me 16 gola të shënuar në 14 paraqitje, ai gjithashtu udhëheq në garën për çmimin e sulmuesit më të mirë në Evropë, mirëpo menjëherë pas tij është ylli argjentinas Mesi i cili ka të shënuar vetëm një gol më pak se Ronaldo. Përveç kësaj, Ronaldo është autor i 53 golave në 56 paraqitje të tija në fanellën mbretërore ndërsa konkurrenti i tij kryesor, Mesi në 72 paraqitjet e fundit te Barcelona ka të shënuara 72 gola. Këto shifra marramendëse i vendosin këta dy futbollist në piedestalin e legjendave futbollistike si Pele, Maradona, Pushkash, Di Stefano apo Hugo Sançez. Që të dy futbollistët janë në moshë të re dhe lufta e tyre për trofe apo çmime individuale pritet të vazhdojë edhe shumë kohë ndërsa cili do të shpallet më i miri duhet të vendosë vet koha.
